الشنطة البرتقانى

أنا كنت مسافر بره ..
..
وعلى مدار الشهرين اللى فاتو كنت باتنقل كتير من حته لحته .. ساعات شغل،ساعات زيارات بس فى الاغلب سياحة .

.. لما سبت مصر .. كان معايا شنطة سوداء عملاقة كده .. فيها كل الحاجات والمحتاجات و حاجات كتيرة ماكتشفتهاش اصلا غير وانا بافضيها بعد ما رجعت مصر :)

وكان معايا شنطه هاند باج "بيج" متوسطة الحجم ..

لما كنت بروح حته عشان استقر شوية كنت باسحب معايا الشنطة السودا .. لو رايح حته يومين تلاته باخد الشنطة البيج ..


اخر سفرية كنت هاروح 3ايام مكان جديد .. رايح بالطيارة معرفش هوصل ازاى للفندق فقررت ان الشنطة البيج هتبقى تقيلة ولذلك إستعرت من أحد الأصدقاء شنطة ظهر صغيرة برتقانى عشان تبقى اسهل فى الحركة و رحت حاطط فيها الاساسيات

الغريبة .. ان خلال ال3ايام دول انا ماحتاجتش اى حاجة اكتر من اللى فى الشنطة البرتقانى وكانت حركتى اسهل واسرع والصراحة .. انا كنت مبسوط

(-ايه يا عم القصة الهبلة دى؟؟ واحنا مالنا؟؟ -اصبر شوية عليا يا نجم)

.. وانا هناك ..جاتلى كده لحظة "تجلى" هو انا ايه اللى خلانى اخد الشنطة السودا الكبيرة دى من الاول اصلا ؟؟ .... احنا فى الدنيا دى شايلين معانا شنطة سودا كبيرة .. مليانة اوى وتقيلة .. مليانة اشياء ، حاجات بنعملها بل واشخاص و علاقات كمان .. الحاجات دى احنا مقتنعين انها مهمة واساسية .. لكن فى الحقيقة مش كلها كده اغلبها حاجات مزوده وزن الشنطة ومكتفانا ومش مخليانا نتحرك بحرية .. الحاجات دى مهمة بردو لكن تعتبر كماليات .. و ممكن من كتر الزحمة والدوشة تخلينا ننسى الاساسيات اللى هى احنا فعلا محتاجينه ..


عشان كده لما رجعت فررت اعمل شنطة برتقانى تخيلية..حطيط فيها دينى-اهلى -أصحاب معينين - اشياء - حاجات بعملها انا اراها اساسية .. حاجات انا مش عايزها تضيع فى الزحمة

وقررت انى حتى لو ناوى اشيل الشنطة السودا معايا فى اى حتة..

هتفضل دابما على كتفى الشنطة البرتقانى ...


(شكل 1) - حقيبة ظهر برتقالية اللون
.............................................................................



أنشطة:

1- (شكل 1)اشترى شنطة برتقانى
(الشنطة بتاعة موبينيل اللى ببلاش مع الخط دى حلوة بردو:) )


2- اكتب مما حفظت :
قائمة بالاشياء والاشخاص اللى شايف انها تستحق تتحط ف الشنطة دى
(مش فى الكومنتات، فى دماغك )


:)